Mae gan lawer o gwmnïau aelodau staff allweddol sy'n hollbwysig i lwyddiant y busnes. Gall colli'r gweithwyr hyn, hyd yn oed am gyfnod byr, arwain at effaith sylweddol ar elw, parhad a hyfywedd hirdymor eich busnes.

Math o bolisi yswiriant bywyd yw yswiriant ar gyfer unigolion allweddol a drefnir gan y busnes ar fywyd gweithiwr allweddol. Os bydd yr unigolyn hwnnw'n marw neu'n dioddef o salwch critigol, byddai'r polisi'n talu cyfandaliad i'r busnes fyddai'n gallu cael ei ddefnyddio i ddigolledu'r busnes am y costau ynghlwm wrth golli'r unigolyn allweddol hwnnw yn ystod y broses o recriwtio a hyfforddi unigolyn arall i gymryd ei le.

Fel cyfarwyddwr y cwmni, rhanddeiliad neu bartner, yn aml iawn, eich busnes yw un o'ch asedau pwysicaf ac fel y cyfryw mae'n bwysig gwarchod perchnogaeth y cwmni.

Os bydd un o berchnogion y busnes yn marw neu'n ddifrifol wael, mae'n bosib na fydd y busnes yn gallu parhau fel arfer, a gall ei gyfranddaliadau trosglwyddo i ŵr neu wraig neu'r teulu fel rhan o'i ystâd bersonol.

Trwy drefnu gwarchod y bartneriaeth neu'r rhanddeiliaid, yn dibynnu ar statws eich cwmni, gellir sicrhau fod dyfodol eich busnes yn ddiogel. Yn achos hawliad dilys byddai'r polisi yn talu cyfandaliad fyddai'n galluogi gweddill perchnogion y busnes i brynu'r cyfranddaliadau, heb orfod benthyg cyllid neu amharu ar lif arian y busnes a sicrhau fod dibynyddion yr unigolyn a fu farw yn cael eu digolledu mewn ffordd briodol.

Bydd gan y rhan fwyaf o gwmnïau ymrwymiadau ariannol megis morgais masnachol, benthyciadau busnes neu orddrafft.

Gellir diogelu'r ymrwymiadau hyn trwy ddefnyddio polisi yswiriant bywyd i warchod benthyciadau. Bydd y cynllun yn talu cyfandaliad i'r busnes yn achos marwolaeth neu salwch difrifol unigolyn allweddol fydd yn galluogi gweddill perchnogion y busnes i dalu unrhyw ymrwymiadau sy'n weddill ar y benthyciad a pharhau i fasnachu fel arfer.

Math o bolisi yswiriant ar gyfer unigolyn sy'n marw yn y swydd i berchnogion busnesau bach yw hwn, os nad yw'n hyfyw sefydlu cynllun ar gyfer marw yn y swydd ar gyfer grŵp oherwydd nifer fach o weithwyr. Mae'r cynlluniau hyn yn ffordd dreth-effeithiol o drefnu yswiriant bywyd i gyfarwyddwyr y cwmni a gweithwyr allweddol.

Diben y polisi yw talu cyfandaliad os bydd yr unigolyn a enwir yn y polisi'n marw neu'n cael diagnosis o salwch critigol yn ystod ei gyfnod fel gweithiwr gyda'r cwmni yn ystod bywyd y polisi. Telir buddion y cynllun i ymddiriedolaeth ddewisol. Fel arfer aelodau teulu a dibynyddion yr unigolyn a yswiriwyd bydd yn elwa o'r ymddiriedolaeth.

Gall yr holl gynlluniau uchod hefyd gynnwys polisi salwch critigol os telir premiwm ychwanegol a bydd yn berthnasol i'r unigolyn a yswirir os caiff diagnosis o salwch critigol sy'n bodloni'r diffiniadau a amlinellir gan y darparwr a ddewiswyd.

Mae gweithwyr da yn hanfodol i lwyddiant unrhyw fusnes. Fel perchennog busnes, mae cynnig pecyn buddion cynhwysfawr i'ch staff yn ffordd wych i annog ffyddlondeb, llesiant a chymhelliant staff.
Trwy sicrhau fod eich gweithwyr a'u teuluoedd yn cael eu gwarchod yn achos salwch, damwain neu farwolaeth rydych yn dangos dyletswydd gofal, ac ystyrir fod y cwmni'n gyflogwr da.  
Mae nifer o fathau gwahanol o fuddion ar gael, sy'n eich galluogi i deilwra cynllun sy'n addas i chi a'ch gweithwyr. Ymhlith rhai o'r opsiynau sydd ar gael mae:

• Yswiriant Bywyd ar gyfer Grŵp
• Polisi Salwch Critigol ar gyfer Grŵp
• Polisi Diogelu Incwm ar gyfer Grŵp
• Yswiriant Meddygol Preifat ar gyfer Grŵp

Mae llawer o'r buddion hyn hefyd yn dreth-effiethiol, felly mae'n werth cysylltu â ni i gael cyngor i sicrhau fod eich strategaeth mor effeithlon â phosib.